azal abad se bahut dur jhumte the hum

azal abad se bahut duur jhūmte the ham

kisī ke dhyān meñ kuchh din ko jā base the ham

vo ġham ho yā ho ḳhushī kaif kam na hotā thā

ajiib raah se ho kar guzar rahe the ham

bahut aziiz the ham ko hamāre dost magar

ik ajnabī ke liye sab se chhuT ga.e the ham

karam se aap ke sarshār thā ye dil lekin

ḳhushī kī aañch meñ kyā kyā pighal rahe the ham

tumheñ to yaad kahāñ hoñge ab magar vo din

na dekh kar tumheñ har lamha dekhte the ham

vo ek kaif kā aalam vo ārzū-mandī

na jaane kaun sī duniyā meñ jī rahe the ham

azal abad se bahut dur jhumte the hum

kisi ke dhyan mein kuchh din ko ja base the hum

wo gham ho ya ho KHushi kaif kam na hota tha

ajib rah se ho kar guzar rahe the hum

bahut aziz the hum ko hamare dost magar

ek ajnabi ke liye sab se chhuT gae the hum

karam se aap ke sarshaar tha ye dil lekin

KHushi ki aanch mein kya kya pighal rahe the hum

tumhein to yaad kahan honge ab magar wo din

na dekh kar tumhein har lamha dekhte the hum

wo ek kaif ka aalam wo aarzu-mandi

na jaane kaun si duniya mein ji rahe the hum