azal mein ho na ho ye jalwa-gah-e-ru-e-jaanan tha

azal meñ ho na ho ye jalva-gāh-e-rū-e-jānāñ thā

ki sub.h-e-hashr bhī ḳhurshīd kā ā.īna larzāñ thā

junūñ ke sar pe jab tak panja-e-vahshat kā sāmāñ thā

garebāñ thā abhī dāman abhī dāman garebāñ thā

ḳhudā jaane qafas meñ kyoñ taḌap kar mar ga.ī bulbul

ye dekhā hai abhī bijlī kā ruḳh sū-e-gulistāñ thā

zamīn-o-āsmāñ kī qaid kaisī josh-e-vahshat meñ

jahāñ tak bhī nazar pahūñchī bayābāñ hī bayābāñ thā

falak par naaz umaDte the zamīñ se naaz ubalte the

vo aalam thā ajab aalam ki jab koī ḳhirāmāñ thā

mire dil kī tarah the chaak donoñ ishq ke hāthoñ

zuleḳhā kā garebāñ thā ki vo yūsuf kā dāmāñ thā

tan-e-murda pe ḳhauf-o-shauq se ye ruuh kahtī hai

yahī zindāñ thā ghar apnā yahī ghar apnā zindāñ thā

mire jiine se maut achchhī qasam hai be-gunāhī kī

vahī dil de mujhe yā-rab ki jis meñ shauq-e-isyāñ thā

phirī hai jab kabhī tasvīr āñkhoñ meñ qayāmat kī

ye dekhā hai ki apne haath meñ apnā garebāñ thā

siyāhī shām-e-furqat kī simaT aa.ī thī āñkhoñ meñ

ki roz-e-hashr nazroñ meñ mirī shām-e-ġharībāñ thā

lahad se qaid-ḳhāne ke bhī qaidī chhuT ga.e lekin

na chhūTe jis ke qaidī hashr meñ bhī dil vo zindāñ thā

mirī nazroñ meñ ab tak hai ye duniyā naaz kī duniyā

huī muddat ki ik andāz se koī ḳhirāmāñ thā

vidā-e-yār kī tajdīd ke armāñ se marte haiñ

vahī saa.at phir aatī jis meñ mar jaane kā sāmāñ thā

kisī ko pyaar aatā thā kisī ko haul aate the

maiñ ik ḳhvāb-e-pareshāñ thā meñ ik zulf-e-pareshāñ thā

zarūrat aise jalve ko thī be-shak aise majma.a kī

khulā ab hashr ke va.ade meñ jo kuchh raaz pinhāñ thā

ḳhayāl-o-dil nigāh-o-chashm kā aalam hī dekhā hai

vo har dam thā mire āġhosh meñ har dam gurezāñ thā

ye kaifiyyat thī in āñkhoñ kī 'beḳhud' josh-e-mastī meñ

ghaTā.eñ jhuktī uThtī thiiñ baras paḌne kā sāmāñ thā

azal mein ho na ho ye jalwa-gah-e-ru-e-jaanan tha

ki subh-e-hashr bhi KHurshid ka aaina larzan tha

junun ke sar pe jab tak panja-e-wahshat ka saman tha

gareban tha abhi daman abhi daman gareban tha

KHuda jaane qafas mein kyon taDap kar mar gai bulbul

ye dekha hai abhi bijli ka ruKH su-e-gulistan tha

zamin-o-asman ki qaid kaisi josh-e-wahshat mein

jahan tak bhi nazar pahunchi bayaban hi bayaban tha

falak par naz umaDte the zamin se naz ubalte the

wo aalam tha ajab aalam ki jab koi KHiraman tha

mere dil ki tarah the chaak donon ishq ke hathon

zuleKHa ka gareban tha ki wo yusuf ka daman tha

tan-e-murda pe KHauf-o-shauq se ye ruh kahti hai

yahi zindan tha ghar apna yahi ghar apna zindan tha

mere jine se maut achchhi qasam hai be-gunahi ki

wahi dil de mujhe ya-rab ki jis mein shauq-e-isyan tha

phiri hai jab kabhi taswir aankhon mein qayamat ki

ye dekha hai ki apne hath mein apna gareban tha

siyahi sham-e-furqat ki simaT aai thi aankhon mein

ki roz-e-hashr nazron mein meri sham-e-ghariban tha

lahad se qaid-KHane ke bhi qaidi chhuT gae lekin

na chhuTe jis ke qaidi hashr mein bhi dil wo zindan tha

meri nazron mein ab tak hai ye duniya naz ki duniya

hui muddat ki ek andaz se koi KHiraman tha

wida-e-yar ki tajdid ke arman se marte hain

wahi saat phir aati jis mein mar jaane ka saman tha

kisi ko pyar aata tha kisi ko haul aate the

main ek KHwab-e-pareshan tha mein ek zulf-e-pareshan tha

zarurat aise jalwe ko thi be-shak aise majma ki

khula ab hashr ke wade mein jo kuchh raaz pinhan tha

KHayal-o-dil nigah-o-chashm ka aalam hi dekha hai

wo har dam tha mere aaghosh mein har dam gurezan tha

ye kaifiyyat thi in aankhon ki 'beKHud' josh-e-masti mein

ghaTaen jhukti uThti thin baras paDne ka saman tha