aziyyaton ka naya silsila to hona tha

aziyyatoñ kā nayā silsila to honā thā

kuchh is liye bhī tujhe ab judā to honā thā

ki pahlī baar safar aur vo bhī tanhā safar

ki paash paash mirā hausla to honā thā

jab ek umr huī tīrgī nigalte hue

mirā charāġh se ab sāmnā to honā thā

idhar udhar ke sahāroñ ne be-sahārā kiyā

koī na hotā jo merā ḳhudā to honā thā

tū mere saath agar aise haath na kartā

maiñ ḳhud kā ho na sakā par tirā to honā thā

ajiib shaḳhs hai ujlat meñ kaaT baiThā hai

vagarna peḌ thā āḳhir harā to honā thā

hamāre beach mohabbat shadīd thī 'irshād'

hamāre beach bahut fāsla to honā thā

aziyyaton ka naya silsila to hona tha

kuchh is liye bhi tujhe ab juda to hona tha

ki pahli bar safar aur wo bhi tanha safar

ki pash pash mera hausla to hona tha

jab ek umr hui tirgi nigalte hue

mera charagh se ab samna to hona tha

idhar udhar ke sahaaron ne be-sahaara kiya

koi na hota jo mera KHuda to hona tha

tu mere sath agar aise hath na karta

main KHud ka ho na saka par tera to hona tha

ajib shaKHs hai ujlat mein kaT baiTha hai

wagarna peD tha aaKHir hara to hona tha

hamare beach mohabbat shadid thi 'irshad'

hamare beach bahut fasla to hona tha