ba-faiz-e-agahi ye kya azab dekh liya

ba-faiz-e-āgahī ye kyā azaab dekh liyā

ki ḳhud hī apne kiye kā hisāb dekh liyā

ye nasl nasl masāfat bahal rahī hai yūñhī

sarāb jāgte sote meñ ḳhvāb dekh liyā

diloñ kī tīrgī dhone ko log uThe haiñ jab

chhatoñ par utrā huā āftāb dekh liyā

saroñ se taaj baḌe jism se abā.eñ baḌī

zamāne ham ne tirā intiḳhāb dekh liyā

vo fāḳhta jise laanā thā amn kā paiġhām

uḌī nahīñ thī ki us ne uqaab dekh liyā

kabhī vo khul ke kabhī sarsarī milā ham se

kabhī hilāl kabhī māhtāb dekh liyā

kitāb paḌhne kī fursat yahāñ kise 'anjum'

bahut huā to faqat intisāb dekh liyā

ba-faiz-e-agahi ye kya azab dekh liya

ki KHud hi apne kiye ka hisab dekh liya

ye nasl nasl masafat bahal rahi hai yunhi

sarab jagte sote mein KHwab dekh liya

dilon ki tirgi dhone ko log uThe hain jab

chhaton par utra hua aaftab dekh liya

saron se taj baDe jism se abaen baDi

zamane hum ne tera intiKHab dekh liya

wo faKHta jise lana tha amn ka paigham

uDi nahin thi ki us ne uqab dekh liya

kabhi wo khul ke kabhi sarsari mila hum se

kabhi hilal kabhi mahtab dekh liya

kitab paDhne ki fursat yahan kise 'anjum'

bahut hua to faqat intisab dekh liya