ba-faiz-e-ishq harf-e-ain par DaTe rahe hain hum

ba-faiz-e-ishq harf-e-ain par DaTe rahe haiñ ham

shurūa se shurūa Thiik bāñdhte rahe haiñ ham

galī meñ koī thā nahīñ jo kahtā jāgte raho

isī liye tamām raat jāgte rahe haiñ ham

bujhe bujhe se is liye ajiib lag rahe ho tum

baḌe qarīb se ye aag tāpte rahe haiñ ham

hameñ hai aur dastaras sanam-garī ke kaam par

mujassamoñ ko pattharoñ meñ Dhālte rahe haiñ ham

nikal gayā thā vo hasīn apnī zulf bāñdh kar

havā kī bāqiyāt ko sameTte rahe haiñ ham

ba-faiz-e-ishq harf-e-ain par DaTe rahe hain hum

shurua se shurua Thik bandhte rahe hain hum

gali mein koi tha nahin jo kahta jagte raho

isi liye tamam raat jagte rahe hain hum

bujhe bujhe se is liye ajib lag rahe ho tum

baDe qarib se ye aag tapte rahe hain hum

hamein hai aur dastaras sanam-gari ke kaam par

mujassamon ko pattharon mein Dhaalte rahe hain hum

nikal gaya tha wo hasin apni zulf bandh kar

hawa ki baqiyat ko sameTte rahe hain hum