ba-har-surat mohabbat ka yahi anjam dekha hai

ba-har-sūrat mohabbat kā yahī anjām dekhā hai

ki jaañ de kar bhī insāñ ko yahāñ nākām dekhā hai

jahāñ pahuñchī haiñ parde chaak kar ke 'ishq kī nazreñ

kahāñ tū ne vo manzar ai nigāh-e-ām dekhā hai

nigāh-e-yār ko barham kiyā hai maiñ ne ḳhud aksar

kabhī jo dard ko dil ke zarā ārām dekhā hai

laboñ tak mere baḌh ke ḳhud hī aa pahuñchā hai ai saaqī

nazar bhar kar kabhī maiñ ne jo sū-e-jām dekhā hai

kiyā hai munkir-o-sarkash ko bhī sairāb duniyā meñ

tire abr-e-karam ne kis ko tishna-kām dekhā hai

dil-o-jāñ kar diye nazr-e-nigāh-e-nāz bas maiñ ne

na kuchh āġhāz dekhā hai na kuchh anjām dekhā hai

marīz-e-ġham kī hālat dekhne vaale ye kahte haiñ

ki be-hoshī meñ bhī lab par tumhārā naam dekhā hai

ye apnī muḳhtasar hai 'ashk' rūdād-e-rah-e-ulfat

ki bas nākāmiyoñ ko saath har har gaam dekhā hai

ba-har-surat mohabbat ka yahi anjam dekha hai

ki jaan de kar bhi insan ko yahan nakaam dekha hai

jahan pahunchi hain parde chaak kar ke 'ishq ki nazren

kahan tu ne wo manzar ai nigah-e-am dekha hai

nigah-e-yar ko barham kiya hai main ne KHud aksar

kabhi jo dard ko dil ke zara aaram dekha hai

labon tak mere baDh ke KHud hi aa pahuncha hai ai saqi

nazar bhar kar kabhi main ne jo su-e-jam dekha hai

kiya hai munkir-o-sarkash ko bhi sairab duniya mein

tere abr-e-karam ne kis ko tishna-kaam dekha hai

dil-o-jaan kar diye nazr-e-nigah-e-naz bas main ne

na kuchh aaghaz dekha hai na kuchh anjam dekha hai

mariz-e-gham ki haalat dekhne wale ye kahte hain

ki be-hoshi mein bhi lab par tumhaara nam dekha hai

ye apni muKHtasar hai 'ashk' rudad-e-rah-e-ulfat

ki bas nakaamiyon ko sath har har gam dekha hai