ba-in gudaz ajab rang ka bayan hota

ba-īñ gudāz ajab rañg kā bayāñ hotā

koī raqīb jo apne bhī darmiyāñ hotā

jhukā huā hai jo sar aaj tere qadmoñ par

agar na vaqt bigaḌtā to āstāñ hotā

har ek rah pe ga.e aur ye bhūlte hī ga.e

vo ek naqsh-e-qadam thā kahāñ kahāñ hotā

tire nisār dil-e-ġhair-mutma.in pe na jā

use jo ishq bhī miltā to imtihāñ hotā

liyā na va.ada-e-dīdār jaan kar varna

phir intizār kā yaarā hameñ kahāñ hotā

koī to rañg-e-suḳhan de ki log kahte haiñ

lagī thī aag to kuchh aag kā nishāñ hotā

tirī nazar ke talātum meñ rah gayā varna

mirā bhī naam tajammul-husain-ḳhāñ hotā

akele tum hī to is shahr meñ nahīñ 'ālī'

burā hī thā jo vo tum sā hī nukta-dāñ hotā

ba-in gudaz ajab rang ka bayan hota

koi raqib jo apne bhi darmiyan hota

jhuka hua hai jo sar aaj tere qadmon par

agar na waqt bigaDta to aastan hota

har ek rah pe gae aur ye bhulte hi gae

wo ek naqsh-e-qadam tha kahan kahan hota

tere nisar dil-e-ghair-mutmain pe na ja

use jo ishq bhi milta to imtihan hota

liya na wada-e-didar jaan kar warna

phir intizar ka yara hamein kahan hota

koi to rang-e-suKHan de ki log kahte hain

lagi thi aag to kuchh aag ka nishan hota

teri nazar ke talatum mein rah gaya warna

mera bhi nam tajammul-husain-KHan hota

akele tum hi to is shahr mein nahin 'ali'

bura hi tha jo wo tum sa hi nukta-dan hota