ba-qadr-e-fikr sujhae hue usi ke hain

ba-qadr-e-fikr sujhā.e hue usī ke haiñ

ye saare lafz batā.e hue usī ke haiñ

har ek shāḳh pe min-fazl-e-rabbī likkhā hai

tamām phuul khilā.e hue usī ke haiñ

ye mominīn haiñ shahkār us kī qudrat kā

ye mushrikīn banā.e hue usī ke haiñ

usī ne 'arsh pe Tāñkā hai chāñd-tāroñ ko

zamīñ pe peḌ lagā.e hue usī ke haiñ

vagarna aañkh meñ qabza thā ġham kī faujoñ kā

ham aise log hañsā.e hue usī ke haiñ

ye qaum-e-lūt kī bad-kāriyoñ ke chehre par

'azāb-o-qahr sajā.e hue usī ke haiñ

usī ke hukm kā pāband hai qalam merā

ye saare she'r likhā.e hue usī ke haiñ

ba-qadr-e-fikr sujhae hue usi ke hain

ye sare lafz batae hue usi ke hain

har ek shaKH pe min-fazl-e-rabbi likkha hai

tamam phul khilae hue usi ke hain

ye mominin hain shahkar us ki qudrat ka

ye mushrikin banae hue usi ke hain

usi ne 'arsh pe Tanka hai chand-taron ko

zamin pe peD lagae hue usi ke hain

wagarna aankh mein qabza tha gham ki faujon ka

hum aise log hansae hue usi ke hain

ye qaum-e-lut ki bad-kariyon ke chehre par

'azab-o-qahr sajae hue usi ke hain

usi ke hukm ka paband hai qalam mera

ye sare she'r likhae hue usi ke hain