ba-qadr-e-zarf mohabbat ka karobar chale

ba-qadr-e-zarf mohabbat kā kārobār chale

maza to jab hai ki har lamha zikr-e-yār chale

tirī nigāh ke jab ahl-e-dil pe vaar chale

ḳhizāñ-nasīb chaman jānib-e-bahār chale

utar na jaa.e kahīñ tere husn kī rañgat

ki terī bazm se ab tere jāñ-nisār chale

jo aa ga.ī kabhī sar dene kī ghaḌī ai dost

ḳhushī ḳhushī tire dīvāne sū-e-dār chale

udaas dekh ke māhaul-e-mai-kada saaqī

niyāz-mand-e-vafā aaj sogvār chale

ma.āl-e-lazzat-e-shauq-e-visāl kī saugand

qarār māñgne aa.e the be-qarār chale

ḳhayāl-e-bāda-kashī aa gayā jo ai 'maikash'

adab se jānib-e-mai-ḳhāna bāda-ḳhvār chale

ba-qadr-e-zarf mohabbat ka karobar chale

maza to jab hai ki har lamha zikr-e-yar chale

teri nigah ke jab ahl-e-dil pe war chale

KHizan-nasib chaman jaanib-e-bahaar chale

utar na jae kahin tere husn ki rangat

ki teri bazm se ab tere jaan-nisar chale

jo aa gai kabhi sar dene ki ghaDi ai dost

KHushi KHushi tere diwane su-e-dar chale

udas dekh ke mahaul-e-mai-kada saqi

niyaz-mand-e-wafa aaj sogwar chale

maal-e-lazzat-e-shauq-e-visal ki saugand

qarar mangne aae the be-qarar chale

KHayal-e-baada-kashi aa gaya jo ai 'maikash'

adab se jaanib-e-mai-KHana baada-KHwar chale