ba-roz-e-hashr mera ehtisab kya hoga

ba-roz-e-hashr mirā ehtisāb kyā hogā

ki is zamīñ ke sivā aur azaab kyā hogā

mudām fikr meñ be-aql kā tasalsul-e-kār

kitāb-e-zīst kā ā.inda baab kyā hogā

javāñ diloñ meñ faqat nafrateñ hī miltī haiñ

ziyāda is se koī inqalāb kyā hogā

atā kiyā mah-e-kāmil ko ishratoñ kā ġhurūr

añdherī raat se baḌh kar azaab kyā hogā

tilism-e-kaif-o-nazar mudda.ā-e-be-ḳhabarī

tilism-e-hosh-o-ḳhirad kā nisāb kyā hogā

gunāhgār nazar bhī hai dil kī dhaḌkan bhī

vo pūchh leñge to merā javāb kyā hogā

ba-faiz-e-jur.at-e-rindāna dekhnā to 'anīs'

adā-shanāsoñ kā tujh par itaab kyā hogā

ba-roz-e-hashr mera ehtisab kya hoga

ki is zamin ke siwa aur azab kya hoga

mudam fikr mein be-aql ka tasalsul-e-kar

kitab-e-zist ka aainda bab kya hoga

jawan dilon mein faqat nafraten hi milti hain

ziyaada is se koi inqalab kya hoga

ata kiya mah-e-kaamil ko ishraton ka ghurur

andheri raat se baDh kar azab kya hoga

tilism-e-kaif-o-nazar muddaa-e-be-KHabari

tilism-e-hosh-o-KHirad ka nisab kya hoga

gunahgar nazar bhi hai dil ki dhaDkan bhi

wo puchh lenge to mera jawab kya hoga

ba-faiz-e-jurat-e-rindana dekhna to 'anis'

ada-shanason ka tujh par itab kya hoga