ba-zahir ye wahi milne bichhaDne ki hikayat hai

ba-zāhir ye vahī milne bichhaḌne kī hikāyat hai

yahāñ lekin gharoñ ke bhī ujaḌne kī hikāyat hai

sipah-sālār kuchh likhtā hai tasvīr-e-hazīmat meñ

magar ye to adū ke paañv paḌne kī hikāyat hai

kanīz-e-be-navā ne ek shahzāde ko chāhā kyuuñ

mohabbat zinda dīvāroñ meñ gaḌne kī hikāyat hai

khulī āñkheñ to kāñdhoñ par kitāboñ se bharā basta

laḌakpan ab kahāñ titlī pakaḌne kī hikāyat hai

ka.ī sadiyāñ gañvā diiñ ham ne kam-koshī kī rāhat meñ

bahut hī dukh bharī apne bichhaḌne kī hikāyat hai

parā.ī ḳhaak ne un par kahīñ bāñheñ na phailā.īñ

ye hijrat kā safar jaḌ se ukhaḌne kī hikāyat hai

qadam kab tak jame rahte mire sailāb kī zad meñ

mirī be-chārgī tinke pakaḌne kī hikāyat hai

ba-zahir ye wahi milne bichhaDne ki hikayat hai

yahan lekin gharon ke bhi ujaDne ki hikayat hai

sipah-salar kuchh likhta hai taswir-e-hazimat mein

magar ye to adu ke panw paDne ki hikayat hai

kaniz-e-be-nawa ne ek shahzade ko chaha kyun

mohabbat zinda diwaron mein gaDne ki hikayat hai

khuli aankhen to kandhon par kitabon se bhara basta

laDakpan ab kahan titli pakaDne ki hikayat hai

kai sadiyan ganwa din hum ne kam-koshi ki rahat mein

bahut hi dukh bhari apne bichhaDne ki hikayat hai

parai KHak ne un par kahin banhen na phailain

ye hijrat ka safar jaD se ukhaDne ki hikayat hai

qadam kab tak jame rahte mere sailab ki zad mein

meri be-chaargi tinke pakaDne ki hikayat hai