ba-KHabar tha ek nazar mein do-jahan le jaega

bā-ḳhabar thā ik nazar meñ do-jahāñ le jā.egā

merī jaañ ban kar vo ik din merī jaañ le jā.egā

āḳhrī hichkī se pahle chāra-gar se pūchh luuñ

jo nazar aatā nahīñ rishta kahāñ le jā.egā

mai-kada dair-o-haram yā koī divānoñ ki bazm

tujh se ye bichhḌā huā lamha kahāñ le jā.egā

vo jo pichhle saal sab khetoñ ko sonā de gayā

ab ke vo tūfān kis kis kā makāñ le jā.egā

vo chalā jā.egā mujh se kar ke iqrār-e-vafā

toḌ jā.egā safīna bādbāñ le jā.egā

ishq meñ us ne jalānā hī nahīñ sīkhā kabhī

aag de jā.egā mujh ko ḳhud dhuāñ le jā.egā

ba-KHabar tha ek nazar mein do-jahan le jaega

meri jaan ban kar wo ek din meri jaan le jaega

aaKHri hichki se pahle chaara-gar se puchh lun

jo nazar aata nahin rishta kahan le jaega

mai-kada dair-o-haram ya koi diwanon ki bazm

tujh se ye bichhDa hua lamha kahan le jaega

wo jo pichhle sal sab kheton ko sona de gaya

ab ke wo tufan kis kis ka makan le jaega

wo chala jaega mujh se kar ke iqrar-e-wafa

toD jaega safina baadban le jaega

ishq mein us ne jalana hi nahin sikha kabhi

aag de jaega mujh ko KHud dhuan le jaega