baad-o-baran ki nigahon mein nami achchhi lagi

bād-o-bārāñ kī nigāhoñ meñ namī achchhī lagī

ham ko apnī zindagī kī bekalī achchhī lagī

qadr kab is zindagī kī zindagī meñ ho sakī

maut aa.ī rū-ba-rū to zindagī achchhī lagī

baḌh ke jis ne thaam lī laġhzish mirī be-sāḳhta

aaj us ma.asūm kī ye sādgī achchhī lagī

guuñj par zanjīr kī ik raqs bismil ne kiyā

zulm kī vahshī fazā meñ naġhmagī achchhī lagī

barmalā kuchh kah diyā kuchh kahte kahte ruk ga.e

ham ko us kī ik kahī ik an-kahī achchhī lagī

baar thā jis kī tabī.at par sadā zauq-e-suḳhan

aaj us ko bhī hamārī shā.irī achchhī lagī

baad-o-baran ki nigahon mein nami achchhi lagi

hum ko apni zindagi ki bekali achchhi lagi

qadr kab is zindagi ki zindagi mein ho saki

maut aai ru-ba-ru to zindagi achchhi lagi

baDh ke jis ne tham li laghzish meri be-saKHta

aaj us masum ki ye sadgi achchhi lagi

gunj par zanjir ki ek raqs bismil ne kiya

zulm ki wahshi faza mein naghmagi achchhi lagi

barmala kuchh kah diya kuchh kahte kahte ruk gae

hum ko us ki ek kahi ek an-kahi achchhi lagi

bar tha jis ki tabiat par sada zauq-e-suKHan

aaj us ko bhi hamari shairi achchhi lagi