بادل کی نہ بے نام نوازش کی طرف جا

بادل کی نہ بے نام نوازش کی طرف جا

اس چھت سے ٹپکتی ہوئی بارش کی طرف جا

ان ہونٹوں کی سوکھی ہوئی پپڑی کو نہیں دیکھ

ہونٹوں پہ ابھرتی ہوئی خواہش کی طرف جا

اب تجھ سے بھی مجھ کو کوئی امید نہیں ہے

بیٹے تو مری آخری خواہش کی طرف جا

اپنے لئے لوگوں میں محبت کو نہیں دیکھ

تو اپنے خلاف اپنی ہی سازش کی طرف جا

رو رو کے ترے اپنے تجھے قتل کریں گے

جذبات کی مت جھوٹی نمائش کی طرف جا

جا دیکھ تجھے کس طرح وہ لوٹ رہا ہے

غافل کبھی دشمن کی رہائش کی طرف جا