baadalon se ishq ki sab hasraton ko chhoD kar

bādaloñ se 'ishq kī sab hasratoñ ko chhoḌ kar

būñdeñ aatī haiñ zamīñ par ḳhvāhishoñ ko chhoḌ kar

gaañv kī miTTī kī soñdhī ḳhushbuoñ ko chhoḌ kar

ham kamāne aa ga.e apnī jaḌoñ ko chhoḌ kar

zindagī meñ ham ko itne zaḳhm phūloñ se mile

dil lagāyā kāñToñ se ham ne guloñ ko chhoḌ kar

daur-e-hāzir meñ 'adālat kā yahī insāf hai

saare kārāgār meñ haiñ mujrimoñ ko chhoḌ kar

āsmāñ chhū leñ magar buniyād se lipTe raheñ

peḌ zinda rah na paayā hai jaḌoñ ko chhoḌ kar

hai faqat duniyā meñ ab to jhuuT kā hī kārobār

kaun sach kahtā yahāñ hai ā.inoñ ko chhoḌ kar

baadalon se 'ishq ki sab hasraton ko chhoD kar

bunden aati hain zamin par KHwahishon ko chhoD kar

ganw ki miTTi ki sondhi KHushbuon ko chhoD kar

hum kamane aa gae apni jaDon ko chhoD kar

zindagi mein hum ko itne zaKHm phulon se mile

dil lagaya kanTon se hum ne gulon ko chhoD kar

daur-e-hazir mein 'adalat ka yahi insaf hai

sare karagar mein hain mujrimon ko chhoD kar

aasman chhu len magar buniyaad se lipTe rahen

peD zinda rah na paya hai jaDon ko chhoD kar

hai faqat duniya mein ab to jhuT ka hi karobar

kaun sach kahta yahan hai aainon ko chhoD kar