bagh behtar ho agar sab peD paude sabz hon

baaġh behtar ho agar sab peḌ paude sabz hoñ

jab tavajjoh chand par hai saare kaise sabz hoñ

raushnī paanī havā kuchh bhī nahīñ detā hameñ

kaun samjhā.e tujhe ham aise kaise sabz hoñ

kuchh ta'alluq toḌ kar ham kyoñ na sukh kā saañs leñ

kyoñ na kuchh shāḳheñ tarāsheñ aur thoḌe sabz hoñ

muskurā kar yuuñ agar tum āsmāñ ko dekh lo

kitne sayyāre tumhārī raushnī se sabz hoñ

ik parinde ne mujhe paanī ke badle dī du'ā

phal ugā.eñ sabz tere zard saare sabz hoñ

qābil-e-‘izzat hue to 'izzateñ mil jā.eñgī

phal bhī lag jā.eñge pahle aap thoḌe sabz hoñ

tū bhī murjhāyā huā hai maiñ bhī murjhāyā huā

aa gale lag jā ki donoñ pahle jaise sabz hoñ

ham numū paate rahe haiñ apnī himmat se 'shu'aib'

pattharoñ meñ ugne vaale aur kitne sabz hoñ

bagh behtar ho agar sab peD paude sabz hon

jab tawajjoh chand par hai sare kaise sabz hon

raushni pani hawa kuchh bhi nahin deta hamein

kaun samjhae tujhe hum aise kaise sabz hon

kuchh ta'alluq toD kar hum kyon na sukh ka sans len

kyon na kuchh shaKHen tarashen aur thoDe sabz hon

muskura kar yun agar tum aasman ko dekh lo

kitne sayyare tumhaari raushni se sabz hon

ek parinde ne mujhe pani ke badle di du'a

phal ugaen sabz tere zard sare sabz hon

qabil-e-‘izzat hue to 'izzaten mil jaengi

phal bhi lag jaenge pahle aap thoDe sabz hon

tu bhi murjhaya hua hai main bhi murjhaya hua

aa gale lag ja ki donon pahle jaise sabz hon

hum numu pate rahe hain apni himmat se 'shu'aib'

pattharon mein ugne wale aur kitne sabz hon