bagh-e-alam mein hai be-rang bayan-e-waiz

bāġh-e-ālam meñ hai be-rañg bayān-e-vā.iz

sūrat-e-barg-e-ḳhizānī hai zabān-e-vā.iz

misr meñ bhī na ye fir.aun kā aalam hogā

dekhe masjid meñ koī shauqat-o-shān-e-vā.iz

ek kāñTā sā nikal jaa.e hamāre dil se

sansiyoñ se koī khīñche jo zabān-e-vā.iz

qulqul-e-shīsha-e-mai se tire mai-kash saaqī

sun rahe haiñ ḳhabar-e-rāz-e-nihān-e-vā.iz

haal ma.alūm huā nār-o-jināñ kā kyūñkar

is qadar to nahīñ ūñchā hai makān-e-vā.iz

nām-e-mai vo hai ki lab par jo kabhī aatā hai

muñh se bāhar nikal aatī hai zabān-e-vā.iz

mai-kade vāloñ se dabne lage masjid vaale

daur saaqī kā hai guzrā vo zamān-e-vā.iz

maiñ bhī vo huuñ jo mire aage kabhī muñh khole

kaaT Dālūñ abhī dāñtoñ se zabān-e-vā.iz

apne rindoñ kī maiñ hū-haq kā huuñ sunñe vaalā

yā-ilāhī na sunānā suḳhnān-e-vā.iz

maiñ parī-zādoñ kā āshiq huuñ to vo hūroñ kā

mere saude se hai baḌh kar ḳhafqān-e-vā.iz

paa.e ḳhum baiTh ke nashshe meñ vo bāteñ kiije

log samjheñ sar-e-mimbar hai bayān-e-vā.iz

ai 'sabā' ḳhuld meñ jā.ūñ ki jahannam meñ jalūñ

na sunā hai na sunūñgā maiñ bayān-e-vā.iz

bagh-e-alam mein hai be-rang bayan-e-waiz

surat-e-barg-e-KHizani hai zaban-e-waiz

misr mein bhi na ye firaun ka aalam hoga

dekhe masjid mein koi shauqat-o-shan-e-waiz

ek kanTa sa nikal jae hamare dil se

sansiyon se koi khinche jo zaban-e-waiz

qulqul-e-shisha-e-mai se tere mai-kash saqi

sun rahe hain KHabar-e-raaz-e-nihan-e-waiz

haal malum hua nar-o-jinan ka kyunkar

is qadar to nahin uncha hai makan-e-waiz

nam-e-mai wo hai ki lab par jo kabhi aata hai

munh se bahar nikal aati hai zaban-e-waiz

mai-kade walon se dabne lage masjid wale

daur saqi ka hai guzra wo zaman-e-waiz

main bhi wo hun jo mere aage kabhi munh khole

kaT Dalun abhi danton se zaban-e-waiz

apne rindon ki main hu-haq ka hun sunne wala

ya-ilahi na sunana suKHnan-e-waiz

main pari-zadon ka aashiq hun to wo huron ka

mere saude se hai baDh kar KHafqan-e-waiz

pae KHum baiTh ke nashshe mein wo baaten kije

log samjhen sar-e-mimbar hai bayan-e-waiz

ai 'saba' KHuld mein jaun ki jahannam mein jalun

na suna hai na sununga main bayan-e-waiz