bagh-e-alam mein rahe shadi-o-matam ki tarah

bāġh-e-ālam meñ rahe shādī-o-mātam kī tarah

phuul kī tarah hañse ro diye shabnam kī tarah

shikva karte ho ḳhushī tum se manā.ī na ga.ī

ham se ġham bhī to manāyā na gayā ġham kī tarah

roz mahfil se uThāte ho to dil dukhtā hai

ab nikalvāo to phir hazrat-e-ādam kī tarah

laakh ham rind sahī hazrat-e-vā'iz lekin

aaj tak ham ne na pī qibla-e-ālam kī tarah

tere andāz-e-jarāhat ke nisār ai qātil

ḳhuun zaḳhmoñ pe nazar aatā hai marham kī tarah

ḳhauf dil se na gayā sub.h ke hone kā 'qamar'

vasl kī raat guzārī hai shab-e-ġham kī tarah

bagh-e-alam mein rahe shadi-o-matam ki tarah

phul ki tarah hanse ro diye shabnam ki tarah

shikwa karte ho KHushi tum se manai na gai

hum se gham bhi to manaya na gaya gham ki tarah

roz mahfil se uThate ho to dil dukhta hai

ab nikalwao to phir hazrat-e-adam ki tarah

lakh hum rind sahi hazrat-e-wa'iz lekin

aaj tak hum ne na pi qibla-e-alam ki tarah

tere andaz-e-jarahat ke nisar ai qatil

KHun zaKHmon pe nazar aata hai marham ki tarah

KHauf dil se na gaya subh ke hone ka 'qamar'

wasl ki raat guzari hai shab-e-gham ki tarah