bais-e-qurb jafa-kar ka ghussa to hai

bā.is-e-qurb jafā-kār kā ġhussa to hai

dil kashīda hī sahī ghuur ke dekhā to hai

pau phaTe yā na phaTe ḳhalvat-e-dil meñ lekin

haañ nahīñ aur nahīñ haañ kā dhuñdalkā to hai

munqata.a kar ke sabhī silk-e-ta.alluq aksar

merī dīvār-e-anā koī girātā to hai

umr kī shaam Dhale paikar-e-zebā us kā

pahle jaisā to nahīñ dil meñ vo tanhā to hai

bā-vuzū dil pe likhī maiñ ne hai tauba apnī

kuchh nahīñ zād-e-safar hurmat-e-tauba to hai

bujh ga.ī aag magar raakh ke malbe ke tale

ik sulagtī huī fariyād kā lahrā to hai

ye bhī mansūba-e-fardā kī na sāzish ho 'shahāb'

haal majrūh kā talvār ne pūchhā to hai

bais-e-qurb jafa-kar ka ghussa to hai

dil kashida hi sahi ghur ke dekha to hai

pau phaTe ya na phaTe KHalwat-e-dil mein lekin

han nahin aur nahin han ka dhundalka to hai

munqata kar ke sabhi silk-e-talluq aksar

meri diwar-e-ana koi giraata to hai

umr ki sham Dhale paikar-e-zeba us ka

pahle jaisa to nahin dil mein wo tanha to hai

ba-wuzu dil pe likhi main ne hai tauba apni

kuchh nahin zad-e-safar hurmat-e-tauba to hai

bujh gai aag magar rakh ke malbe ke tale

ek sulagti hui fariyaad ka lahra to hai

ye bhi mansuba-e-farda ki na sazish ho 'shahab'

haal majruh ka talwar ne puchha to hai