baal bikhere aaj pari turbat par mere aaegi

baal bikhere aaj parī turbat par mere aa.egī

maut bhī merī ek tamāsha aalam ko dikhlā.egī

mahv-e-adā ho jā.ūñgā gar vasl meñ vo sharmā.egī

bār-e-ḳhudāyā dil kī hasrat kaise phir bar aa.egī

kāhīda aisā huuñ maiñ bhī DhūñDā kare na pā.egī

merī ḳhātir maut bhī merī barsoñ sar Takrā.egī

ishq-e-butāñ meñ jab dil uljhā diin kahāñ islām kahāñ

vaa.iz kaalī zulf kī ulfat sab ko raam banā.egī

chañgā hogā jab na marīz-e-kākul-e-shab-gūñ hazrat se

aap kī ulfat iisā kī ab azmat aaj miTā.egī

bahr-ayādat bhī jo na ā.eñge na hamāre bālīñ par

barsoñ mere dil kī hasrat sar par ḳhaak uḌā.egī

dekhūñgā mehrāb-e-haram yaad aa.egī abrū-e-sanam

mere jaane se masjid bhī but-ḳhāna ban jā.egī

ġhāfil itnā husn pe ġhurra dhyān kidhar hai tauba kar

āḳhir ik din sūrat ye sab miTTī meñ mil jā.egī

aarif jo haiñ un ke haiñ bas rañj o rāhat ek 'rasā'

jaise vo guzrī hai ye bhī kisī tarah nibh jā.egī

baal bikhere aaj pari turbat par mere aaegi

maut bhi meri ek tamasha aalam ko dikhlaegi

mahw-e-ada ho jaunga gar wasl mein wo sharmaegi

bar-e-KHudaya dil ki hasrat kaise phir bar aaegi

kahida aisa hun main bhi DhunDa kare na paegi

meri KHatir maut bhi meri barson sar Takraegi

ishq-e-butan mein jab dil uljha din kahan islam kahan

waiz kali zulf ki ulfat sab ko ram banaegi

changa hoga jab na mariz-e-kakul-e-shab-gun hazrat se

aap ki ulfat isa ki ab azmat aaj miTaegi

bahr-ayaadat bhi jo na aaenge na hamare baalin par

barson mere dil ki hasrat sar par KHak uDaegi

dekhunga mehrab-e-haram yaad aaegi abru-e-sanam

mere jaane se masjid bhi but-KHana ban jaegi

ghafil itna husn pe ghurra dhyan kidhar hai tauba kar

aaKHir ek din surat ye sab miTTi mein mil jaegi

aarif jo hain un ke hain bas ranj o rahat ek 'rasa'

jaise wo guzri hai ye bhi kisi tarah nibh jaegi