baalidagi-e-zarf pe dikhlae gae log

bālīdagī-e-zarf pe dikhlā.e ga.e log

har gaam pe gum-nām hai miTvā.e ga.e log

is farsh-e-tilismī ko atā kar dī farāġhat

yuuñ tasht-e-farebī meñ hī bikhrā.e ga.e log

qismat kī lakīroñ meñ jinheñ bāñdh ke rakkhā

āzādī kī masnad pe bhī biThlā.e ga.e log

har roz nayā ek tamāsha huā jaarī

ārā.ish-e-duniyā meñ jo uljhā.e ga.e log

pechīdgī-e-fikr meñ kyā ḳhuub phañsāyā

ehsās ke shānoñ se hī suljhā.e ga.e log

duniyā meñ darindoñ ko baḌe faḳhr se bhejā

har zulm pe phir sabr se samjhā.e ga.e log

ik ḳhauf thā us jā-e-pareshāñ kī fazā meñ

be-ḳhauf jo kuchh nikle vo dhamkā.e ga.e log

be-ḳhaufī se jab ḳhauf baḌhā ahl-e-jahāñ kā

maqtūl hue ḳhaak meñ dafnā.e ga.e log

haq chup hī rahe lab na khuleñ sar na uThā.e

is vāste be-maut bhī marvā.e ga.e log

nairañgī-e-kirdār pe hairān haiñ 'asrā'

sau pahlū se ik bazm meñ milvā.e ga.e log

baalidagi-e-zarf pe dikhlae gae log

har gam pe gum-nam hai miTwae gae log

is farsh-e-tilismi ko ata kar di faraghat

yun tasht-e-farebi mein hi bikhrae gae log

qismat ki lakiron mein jinhen bandh ke rakkha

aazadi ki masnad pe bhi biThlae gae log

har roz naya ek tamasha hua jari

aaraish-e-duniya mein jo uljhae gae log

pechidgi-e-fikr mein kya KHub phansaya

ehsas ke shanon se hi suljhae gae log

duniya mein darindon ko baDe faKHr se bheja

har zulm pe phir sabr se samjhae gae log

ek KHauf tha us ja-e-pareshan ki faza mein

be-KHauf jo kuchh nikle wo dhamkae gae log

be-KHaufi se jab KHauf baDha ahl-e-jahan ka

maqtul hue KHak mein dafnae gae log

haq chup hi rahe lab na khulen sar na uThae

is waste be-maut bhi marwae gae log

nairangi-e-kirdar pe hairan hain 'asra'

sau pahlu se ek bazm mein milwae gae log