baam par aae kitni shan se aaj

baam par aa.e kitnī shaan se aaj

baḌh ga.e aap āsmān se aaj

jab kahā ham ḳhafā haiñ jaan se aaj

bole ḳhush kar deñ imtihān se aaj

kis maze kī havā meñ mastī hai

kahīñ barsī hai āsmān se aaj

be-takalluf na ho koī un se

bane baiThe haiñ mehmān se aaj

maiñ ne chheḌā to kis adā se kahā

kuchh sunoge mirī zabān se aaj

dil ke TukḌoñ kī tarah ham ne chune

TukḌe kuchh dil kī dāstān se aaj

nīchī dāḌhī ne aabrū rakh lī

qarz pī aa.e ik dukān se aaj

ūñche koThoñ ke baiThne vaale

bāteñ karte the āsmān se aaj

nā-tavāñ dil kī be-zabāñ dil kī

aap ne sun lī apne kaan se aaj

koī jā kar 'riyāz' ko samjhā.e

kuchh ḳhafā haiñ vo apnī jaan se aaj

baam par aae kitni shan se aaj

baDh gae aap aasman se aaj

jab kaha hum KHafa hain jaan se aaj

bole KHush kar den imtihan se aaj

kis maze ki hawa mein masti hai

kahin barsi hai aasman se aaj

be-takalluf na ho koi un se

bane baiThe hain mehman se aaj

main ne chheDa to kis ada se kaha

kuchh sunoge meri zaban se aaj

dil ke TukDon ki tarah hum ne chune

TukDe kuchh dil ki dastan se aaj

nichi daDhi ne aabru rakh li

qarz pi aae ek dukan se aaj

unche koThon ke baiThne wale

baaten karte the aasman se aaj

na-tawan dil ki be-zaban dil ki

aap ne sun li apne kan se aaj

koi ja kar 'riyaz' ko samjhae

kuchh KHafa hain wo apni jaan se aaj