bar-e-KHatir hui ye umr-e-gurezan jaanan

bār-e-ḳhātir huī ye umr-e-gurezāñ jānāñ

tujh ko samjhā thā ġham-e-hijr kā darmāñ jānāñ

aa batā.ūñ tujhe āshob-e-tamannā kyā hai

kaise kaTtī hai ye tār-e-shab-e-hijrāñ jānāñ

maiñ ne har ġham ko ġham-e-ishq se ta.abīr kiyā

ġham-e-jāñ ho yā balā se ġham-e-daurāñ jānāñ

koī dekhe mirī āñkhoñ se asīrī kā fusūñ

ghar huā jaatā hai ik halqa-e-zindāñ jānāñ

ek bhī tīr-e-nazar terā ḳhatā jaatā nahīñ

sab hue jaate haiñ paivast-e-rag-e-jāñ jānāñ

ḳhud-kushī hai yā ye izhār-e-ġham-e-furqat hai

ḳhud se hone lagā huuñ dast-o-garebāñ jānāñ

umr-bhar ġhuncha-e-hastī na shagufta dekhā

ham ne jaise bhī basar kī tirā ehsāñ jānāñ

kunj-e-ġhurbat meñ 'muzaffar' ne ġhanīmat samjhā

jis qadar bhī vo huā be-sar-o-sāmāñ jānāñ

bar-e-KHatir hui ye umr-e-gurezan jaanan

tujh ko samjha tha gham-e-hijr ka darman jaanan

aa bataun tujhe aashob-e-tamanna kya hai

kaise kaTti hai ye tar-e-shab-e-hijran jaanan

main ne har gham ko gham-e-ishq se tabir kiya

gham-e-jaan ho ya bala se gham-e-dauran jaanan

koi dekhe meri aankhon se asiri ka fusun

ghar hua jata hai ek halqa-e-zindan jaanan

ek bhi tir-e-nazar tera KHata jata nahin

sab hue jate hain paiwast-e-rag-e-jaan jaanan

KHud-kushi hai ya ye izhaar-e-gham-e-furqat hai

KHud se hone laga hun dast-o-gareban jaanan

umr-bhar ghuncha-e-hasti na shagufta dekha

hum ne jaise bhi basar ki tera ehsan jaanan

kunj-e-ghurbat mein 'muzaffar' ne ghanimat samjha

jis qadar bhi wo hua be-sar-o-saman jaanan