barha tujhse kaha tha mujhe apna na bana

bārhā tujh se kahā thā mujhe apnā na banā

ab mujhe chhoḌ ke duniyā meñ tamāsha na banā

ik yahī dukh mire marne ke liye kaafī hai

jaisā tū chāhtā thā mujh ko maiñ vaisā na banā

ek baat aur pate kī maiñ batā.ūñ tujh ko

āḳhirat bantī chalī jā.egī duniyā na banā

jaan se jā.eñge ham donoñ hī tū bhī maiñ bhī

maiñ to kahtā thā merī jaañ mujhe apnā na banā

ye ḳhudā ban ke ri.āyat nahīñ karte haiñ 'vasī'

husn vāloñ ko kabhī qibla-o-ka.aba na banā

barha tujh se kaha tha mujhe apna na bana

ab mujhe chhoD ke duniya mein tamasha na bana

ek yahi dukh mere marne ke liye kafi hai

jaisa tu chahta tha mujh ko main waisa na bana

ek baat aur pate ki main bataun tujh ko

aaKHirat banti chali jaegi duniya na bana

jaan se jaenge hum donon hi tu bhi main bhi

main to kahta tha meri jaan mujhe apna na bana

ye KHuda ban ke riayat nahin karte hain 'wasi'

husn walon ko kabhi qibla-o-kaba na bana