barish mein ahd toD ke gar mai-kashi hui

bārish meñ ahd toḌ ke gar mai-kashī huī

tauba marī phiregī kahāñ bhīgtī huī

pesh aa.e laakh ranj agar ik ḳhushī huī

parvardigār ye bhī koī zindagī huī

achchhā to donoñ vaqt mile kosiye huzūr

phir bhī marīz-e-ġham kī agar zindagī huī

ai andalīb apne nasheman kī ḳhair maañg

bijlī ga.ī hai sū-e-chaman dekhtī huī

dekho charāġh-e-qabr use kyā javāb de

aa.egī shām-e-hijr mujhe pūchhtī huī

qāsid unhīñ ko jā ke diyā thā hamārā ḳhat

vo mil ga.e the un se koī baat bhī huii?

jab tak ki terī bazm meñ chaltā rahegā jaam

saaqī rahegī gardish-e-daurāñ rukī huī

maanā ki un se raat kā va.ada hai ai 'qamar'

kaise vo aa sakeñge agar chāñdnī huī

barish mein ahd toD ke gar mai-kashi hui

tauba mari phiregi kahan bhigti hui

pesh aae lakh ranj agar ek KHushi hui

parwardigar ye bhi koi zindagi hui

achchha to donon waqt mile kosiye huzur

phir bhi mariz-e-gham ki agar zindagi hui

ai andalib apne nasheman ki KHair mang

bijli gai hai su-e-chaman dekhti hui

dekho charagh-e-qabr use kya jawab de

aaegi sham-e-hijr mujhe puchhti hui

qasid unhin ko ja ke diya tha hamara KHat

wo mil gae the un se koi baat bhi hui?

jab tak ki teri bazm mein chalta rahega jam

saqi rahegi gardish-e-dauran ruki hui

mana ki un se raat ka wada hai ai 'qamar'

kaise wo aa sakenge agar chandni hui