barishon mein ab ke yaad aae bahut

bārishoñ meñ ab ke yaad aa.e bahut

abr jo barse nahīñ chhā.e bahut

jaane kis ke dhyān meñ Duubā thā ḳhvāb

niiñd ne kañgan to khankā.e bahut

phir huā yuuñ lag gayā jī ishq meñ

pahle pahle ham bhī ghabrā.e bahut

manziloñ par baar thā raḳht-e-safar

aur ham aañsū bachā laa.e bahut

mujh se merā rañg māñge hai dhanak

rashk meñ yuuñ bhī haiñ ham-sā.e bahut

dil jo TuuTā saj gayā āñkhoñ kā haaT

is khañDar se nikle pairā.e bahut

zindagī āḳhir pashemāñ kar ga.ī

ham isī mohlat pe itrā.e bahut

qāfile ke ġham meñ ġham shāmil nahīñ

tum 'bakul' aage nikal aa.e bahut

barishon mein ab ke yaad aae bahut

abr jo barse nahin chhae bahut

jaane kis ke dhyan mein Duba tha KHwab

nind ne kangan to khankae bahut

phir hua yun lag gaya ji ishq mein

pahle pahle hum bhi ghabrae bahut

manzilon par bar tha raKHt-e-safar

aur hum aansu bacha lae bahut

mujh se mera rang mange hai dhanak

rashk mein yun bhi hain ham-sae bahut

dil jo TuTa saj gaya aankhon ka haT

is khanDar se nikle pairae bahut

zindagi aaKHir pasheman kar gai

hum isi mohlat pe itrae bahut

qafile ke gham mein gham shamil nahin

tum 'bakul' aage nikal aae bahut