baat apne dil ki wo mujhko batata kyon nahin

baat apne dil kī vo mujh ko batātā kyoñ nahīñ

pyaar gar kartā hai mujh se to jatātā kyoñ nahīñ

ek muddat ho ga.ī pahchān ko us se mirī

ḳhvāb meñ ab bhī bhalā milne vo aatā kyoñ nahīñ

maiñ use apne jigar meñ dhaḌkanoñ sā rakhtā huuñ

saañs meñ sargam sā mujh ko vo basātā kyoñ nahīñ

chāñd ne pūchhā thā mujh se ye batānā to zarā

pahle sā tū yaar mere muskurātā kyoñ nahīñ

sab kī bāteñ sunñe kī fursat to rahtī hai use

phir mirī bātoñ pe us kā dhyān jaatā kyoñ nahīñ

shaam bhī hai jaam bhī hai haiñ mire sab yaar bhī

chaa.e sā dil se mire vo yaar jaatā kyoñ nahīñ

baat apne dil ki wo mujh ko batata kyon nahin

pyar gar karta hai mujh se to jatata kyon nahin

ek muddat ho gai pahchan ko us se meri

KHwab mein ab bhi bhala milne wo aata kyon nahin

main use apne jigar mein dhaDkanon sa rakhta hun

sans mein sargam sa mujh ko wo basata kyon nahin

chand ne puchha tha mujh se ye batana to zara

pahle sa tu yar mere muskuraata kyon nahin

sab ki baaten sunne ki fursat to rahti hai use

phir meri baaton pe us ka dhyan jata kyon nahin

sham bhi hai jam bhi hai hain mere sab yar bhi

chae sa dil se mere wo yar jata kyon nahin