baat ban jae jo tafsil se baaten kar le

baat ban jaa.e jo tafsīl se bāteñ kar le

tishnagī merī agar jhiil se bāteñ kar le

jahāñ ke gaañv se tārīkī nikal saktī hai

dil agar fikr kī qindīl se bāteñ kar le

tū ḳharīdār mire dil kī zamīñ kā hai Thahar

pahle dil ruuh kī tahsīl se bāteñ kar le

ka.aba-e-dil tujhe mahfūz agar rakhnā hai

jā ke ulfat kī abābīl se bāteñ kar le

sirf qur.āñ ke alāva hai bhalā kis kī majāl

jo ki taurāt se injīl se bāteñ kar le

vo suhūlat hameñ goggle ne farāham kī hai

pal meñ insān brazil se bāteñ kar le

āqibat apnī banānī hai agar 'faiz' tujhe

nafs kī uḌtī huī chiil se bāteñ kar le

baat ban jae jo tafsil se baaten kar le

tishnagi meri agar jhil se baaten kar le

jahan ke ganw se tariki nikal sakti hai

dil agar fikr ki qindil se baaten kar le

tu KHaridar mere dil ki zamin ka hai Thahar

pahle dil ruh ki tahsil se baaten kar le

kaba-e-dil tujhe mahfuz agar rakhna hai

ja ke ulfat ki ababil se baaten kar le

sirf quran ke alawa hai bhala kis ki majal

jo ki tauraat se injil se baaten kar le

wo suhulat hamein goggle ne faraham ki hai

pal mein insan brazil se baaten kar le

aaqibat apni banani hai agar 'faiz' tujhe

nafs ki uDti hui chil se baaten kar le