baat kah kar hansa gaya mujhko

baat kah kar hañsā gayā mujh ko

ik tamāshā banā gayā mujh ko

ab to maiñ bhī huuñ paan kā pattā

aisā chūnā lagā gayā mujh ko

mujh ko pahle banāyā putlī phir

uñgliyoñ par nachā gayā mujh ko

jo kisī samt bhī nahīñ jaatā

aisā rasta dikhā gayā mujh ko

le ke mere qalam kā ik bosa

'mīr' 'mīrā' banā gayā mujh ko

zaḳhm phūloñ kī shakl ke de kar

apne fan se sajā gayā mujh ko

rū-ba-rū aa.ine ke maiñ bhī thā

chehra us kā dikhā gayā mujh ko

mard-e-kāmil jo haq-parast bhī thā

bolnā sach batā gayā mujh ko

mere hoñToñ pe hoñT rakh rakh kar

apnī bansī banā gayā mujh ko

aa ke mere qafas meñ vo 'panchhī'

chahchahānā sikhā gayā mujh ko

baat kah kar hansa gaya mujh ko

ek tamasha bana gaya mujh ko

ab to main bhi hun pan ka patta

aisa chuna laga gaya mujh ko

mujh ko pahle banaya putli phir

ungliyon par nacha gaya mujh ko

jo kisi samt bhi nahin jata

aisa rasta dikha gaya mujh ko

le ke mere qalam ka ek bosa

'mir' 'mira' bana gaya mujh ko

zaKHm phulon ki shakl ke de kar

apne fan se saja gaya mujh ko

ru-ba-ru aaine ke main bhi tha

chehra us ka dikha gaya mujh ko

mard-e-kaamil jo haq-parast bhi tha

bolna sach bata gaya mujh ko

mere honTon pe honT rakh rakh kar

apni bansi bana gaya mujh ko

aa ke mere qafas mein wo 'panchhi'

chahchahana sikha gaya mujh ko