baat ko meri alag ho ke na sharmao suno

baat ko merī alag ho ke na sharmāo suno

kuchh kahā chāhūñ huuñ maiñ tum se idhar aao suno

maiñ to jaane kā nahīñ rū-ba-rū us ke yaaro

kuchh vo gar tum se kahe hai to tumhīñ jaao suno

chheḌne ko mire gar aap kā jī chāhe hai

be-adab huuñ maiñ mire haq meñ jo farmāo suno

baat bhī maano kisī kī koī ye bhī zid hai

apne āshiq ke ta.iiñ itnā na tarsāo suno

gul-sanobar kā agar qissa hai tum paas miyāñ

paḌhne vaalā bhī to maujūd huuñ maiñ laao suno

ai dil o diida ma.aal is kā burā hī samjho

dekh kar us ke ta.iiñ itnā na lalchāo suno

'mus.hafī' baat to kahne do zarā qāsid ko

pahle hī harf meñ tum itnā na ghabrāo suno

baat ko meri alag ho ke na sharmao suno

kuchh kaha chahun hun main tum se idhar aao suno

main to jaane ka nahin ru-ba-ru us ke yaro

kuchh wo gar tum se kahe hai to tumhin jao suno

chheDne ko mere gar aap ka ji chahe hai

be-adab hun main mere haq mein jo farmao suno

baat bhi mano kisi ki koi ye bhi zid hai

apne aashiq ke tain itna na tarsao suno

gul-sanobar ka agar qissa hai tum pas miyan

paDhne wala bhi to maujud hun main lao suno

ai dil o dida maal is ka bura hi samjho

dekh kar us ke tain itna na lalchao suno

'mushafi' baat to kahne do zara qasid ko

pahle hi harf mein tum itna na ghabrao suno