baaten na kis ne hum ko kahin tere waste

bāteñ na kis ne ham ko kahīñ tere vāste

aur ham ne bhī na kis kī sahīñ tere vāste

hairān dar-ba-dar paḌe phirte haiñ raat din

ḳhurshīd o maah zohra-jabīñ tere vāste

sīmāb o barq o shola-e-javvāla aur ye dil

betāb un meñ kaun nahīñ tere vāste

ham ne tirī talāsh meñ ai barq-vash kiyā

yaañ ek āsmān o zamīñ tere vāste

shab soz-e-ġham se sham.a-sifat be-qarāriyāñ

kyā kyā na mere dil ko rahīñ tere vāste

tū zeb-e-bazm-e-ġhair rahā aur maiñ yahāñ

bhaTkā phirā kahīñ kā kahīñ tere vāste

ye naale vo haiñ yaad rahe tū na gar milā

pahuñcheñge tā-ba arsh-e-barīñ tere vāste

kuchh aur iḳhtilāf kā baa.is nahīñ faqat

aalam meñ hai chunāñ-o-chunīñ tere vāste

fazl-e-ḳhudā se yaad rahe 'aish' nemateñ

maujūd hoñgī dekh yahīñ tere vāste

baaten na kis ne hum ko kahin tere waste

aur hum ne bhi na kis ki sahin tere waste

hairan dar-ba-dar paDe phirte hain raat din

KHurshid o mah zohra-jabin tere waste

simab o barq o shola-e-jawwala aur ye dil

betab un mein kaun nahin tere waste

hum ne teri talash mein ai barq-wash kiya

yan ek aasman o zamin tere waste

shab soz-e-gham se shama-sifat be-qarariyan

kya kya na mere dil ko rahin tere waste

tu zeb-e-bazm-e-ghair raha aur main yahan

bhaTka phira kahin ka kahin tere waste

ye nale wo hain yaad rahe tu na gar mila

pahunchenge ta-ba arsh-e-barin tere waste

kuchh aur iKHtilaf ka bais nahin faqat

aalam mein hai chunan-o-chunin tere waste

fazl-e-KHuda se yaad rahe 'aish' nematen

maujud hongi dekh yahin tere waste