bazar mein wo barda-faroshon ki Toliyan

bāzār meñ vo barda-faroshoñ kī Toliyāñ

manDī meñ lag rahī haiñ ġhulāmoñ kī boliyāñ

sattar baras se hai ye hukūmat kā mashġhala

detī hai sub.h-shām hameñ roz goliyāñ

gāñTheñ hamārī jaan kā āzār ho ga.iiñ

hāthoñ se de ke ham ne jo dāñtoñ se kholiyāñ

kab tak bane raheñge tumhāre huzūr meñ

insāniyat ke naam pe ham DanDā-Doliyāñ

Tapkā rahī haiñ ras vo abhī tak halaq meñ bhī

kānoñ meñ vo jo shahd sī bāteñ haiñ gholiyāñ

kyā rang lag rahe haiñ tumhārī duāoñ ko

lekin hamārī aaj bhī ḳhālī haiñ jholiyāñ

shahroñ kī bhiiḌ bhaaḌ se matlab nahīñ hameñ

jangal meñ jā ke dil ne dukāneñ haiñ kholiyāñ

tinkoñ se bhī ye hastiyāñ halkī lagīñ hameñ

mīzān meñ zamīr ke jab bhī haiñ toliyāñ

sonā ugalne vaalī zamīnoñ ko kyā huā

tarsī haiñ daane daane ko kaise bhaḌauliyāñ

shāyad ho ek-ādh kahīñ par gaḌī huī

siine pe kaan dhar ke thiiñ sāñseñ TaToliyāñ

bhartā huuñ sub.h-shām tire intizār meñ

āñkheñ hoñ jis tarah se tumhārī ghaḌoliyāñ

ham ne baḌe buzurgoñ kī dastār kī tarah

qadreñ burī tarah se purānī haiñ roliyāñ

bazar mein wo barda-faroshon ki Toliyan

manDi mein lag rahi hain ghulamon ki boliyan

sattar baras se hai ye hukumat ka mashghala

deti hai subh-sham hamein roz goliyan

ganThen hamari jaan ka aazar ho gain

hathon se de ke hum ne jo danton se kholiyan

kab tak bane rahenge tumhaare huzur mein

insaniyat ke nam pe hum DanDa-Doliyan

Tapka rahi hain ras wo abhi tak halaq mein bhi

kanon mein wo jo shahd si baaten hain gholiyan

kya rang lag rahe hain tumhaari duaon ko

lekin hamari aaj bhi KHali hain jholiyan

shahron ki bhiD bhaD se matlab nahin hamein

jangal mein ja ke dil ne dukanen hain kholiyan

tinkon se bhi ye hastiyan halki lagin hamein

mizan mein zamir ke jab bhi hain toliyan

sona ugalne wali zaminon ko kya hua

tarsi hain dane dane ko kaise bhaDauliyan

shayad ho ek-adh kahin par gaDi hui

sine pe kan dhar ke thin sansen TaToliyan

bharta hun subh-sham tere intizar mein

aankhen hon jis tarah se tumhaari ghaDoliyan

hum ne baDe buzurgon ki dastar ki tarah

qadren buri tarah se purani hain roliyan