bazi agarche zist ki hum haar to gae

baazī agarche ziist kī ham haar to ga.e

lekin jo dil pe naqsh the āzār to ga.e

kitne shanāvaroñ ko ye dariyā nigal gayā

tuġhyāniyoñ meñ duub ke ham paar to ga.e

bārish kā zor hai mire ḳhasta makān par

lagtā hai ab ke ye dar-o-dīvār to ga.e

ham log ab qadīm numā.ish kī chiiz haiñ

bāzār se ab apne ḳharīdār to ga.e

vo darmiyāñ ġhazal ke jo uTh kar chalā gayā

ai bazm-e-shā'irī tire me'yār to ga.e

lagtā hai ab ke jaan hī jā.egī ek din

is shā'irī ke shauq meñ ghar-bār to ga.e

chal ai 'nafas' ki ham bhī kahīñ aur jā baseñ

do-chār the jo shahr meñ ġham-ḳhvār to ga.e

bazi agarche zist ki hum haar to gae

lekin jo dil pe naqsh the aazar to gae

kitne shanawaron ko ye dariya nigal gaya

tughyaniyon mein dub ke hum par to gae

barish ka zor hai mere KHasta makan par

lagta hai ab ke ye dar-o-diwar to gae

hum log ab qadim numaish ki chiz hain

bazar se ab apne KHaridar to gae

wo darmiyan ghazal ke jo uTh kar chala gaya

ai bazm-e-sha'iri tere me'yar to gae

lagta hai ab ke jaan hi jaegi ek din

is sha'iri ke shauq mein ghar-bar to gae

chal ai 'nafas' ki hum bhi kahin aur ja basen

do-chaar the jo shahr mein gham-KHwar to gae