bazu-e-na-tawan mein jumbish to dekhiye

bāzū-e-nā-tavān meñ jumbish to dekhiye

sham-e-fasurda se uThī sozish to dekhiye

apne hī dā.eroñ meñ sabhī dauḌte phireñ

is daur kī riyāzat-e-varzish to dekhiye

mazlūm par hī lagte hoñ ilzām jab yahāñ

is dahr meñ fuzūl kī pursish to dekhiye

barsoñ se gūñge-pan kī hameñ miltī rahī daad

ham par hukūmatoñ kī navāzish to dekhiye

āsūdgī jahāñ pe numāyāñ thī ab talak

barpā hai kis qadar vahāñ shorish to dekhiye

bhaTke jo apnī raah se sālār-e-qāfila

sābit-qadam hujūm kī larzish to dekhiye

māñgī nahīñ thī mahr-e-tavajjoh kabhī magar

be-vaj.h ye sazā ye nikohish to dekhiye

le kar zamīñ ke TukḌe ye 'dushyant' se udhār

ḳhud apnā ghar banāne kī koshish to dekhiye

bazu-e-na-tawan mein jumbish to dekhiye

sham-e-fasurda se uThi sozish to dekhiye

apne hi daeron mein sabhi dauDte phiren

is daur ki riyazat-e-warzish to dekhiye

mazlum par hi lagte hon ilzam jab yahan

is dahr mein fuzul ki pursish to dekhiye

barson se gunge-pan ki hamein milti rahi dad

hum par hukumaton ki nawazish to dekhiye

aasudgi jahan pe numayan thi ab talak

barpa hai kis qadar wahan shorish to dekhiye

bhaTke jo apni rah se salar-e-qafila

sabit-qadam hujum ki larzish to dekhiye

mangi nahin thi mahr-e-tawajjoh kabhi magar

be-wajh ye saza ye nikohish to dekhiye

le kar zamin ke TukDe ye 'dushyant' se udhaar

KHud apna ghar banane ki koshish to dekhiye