bachao daman-e-dil aise ham-nashinon se

bachāo dāman-e-dil aise ham-nashīnoñ se

milā ke haath jo Daste haiñ āstīnoñ se

nigār-e-vaqt ko itnā to pairahan de do

chhupā le dīda-e-pur-nam ko āstīnoñ se

hamārī fikr amānat hai sub.h-e-fardā kī

samāñ hai duur kā dekho na ḳhurd-bīnoñ se

ab apne zaḳhm-e-jabīñ ko chhupā bhī le ai dil

Tapak rahā hai pasīna ka.ī jabīnoñ se

tujhe havā-e-muḳhālif jagā diyā kis ne

bahut qarīb thā sāhil ka.ī safīnoñ se

na jaane mujrim-e-zauq-e-nazar pe kyā guzrī

bharī thī rāh-e-tamāsha tamāsh-bīnoñ se

sukūt-e-vaqt muarriḳh hai likh liyā us ne

jo pattharoñ ne kahā be-ḳhatā jabīnoñ se

'shamīm' anjuman-e-ahl-e-zar meñ kyā jaa.eñ

lahū kā rañg jhalaktā hai ābgīnoñ se

bachao daman-e-dil aise ham-nashinon se

mila ke hath jo Daste hain aastinon se

nigar-e-waqt ko itna to pairahan de do

chhupa le dida-e-pur-nam ko aastinon se

hamari fikr amanat hai subh-e-farda ki

saman hai dur ka dekho na KHurd-binon se

ab apne zaKHm-e-jabin ko chhupa bhi le ai dil

Tapak raha hai pasina kai jabinon se

tujhe hawa-e-muKHalif jaga diya kis ne

bahut qarib tha sahil kai safinon se

na jaane mujrim-e-zauq-e-nazar pe kya guzri

bhari thi rah-e-tamasha tamash-binon se

sukut-e-waqt muarriKH hai likh liya us ne

jo pattharon ne kaha be-KHata jabinon se

'shamim' anjuman-e-ahl-e-zar mein kya jaen

lahu ka rang jhalakta hai aabginon se