bachpana guzra aaya ahd-e-shabab

bachpanā guzrā aayā 'ahd-e-shabāb

uḌ ga.ī niiñd dekhne lagā ḳhvāb

chāñdnī phailī hai mire ghar meñ

jāgtā huuñ ki dekhtā huuñ ḳhvāb

talab-e-dīd par girī bijlī

chāhne vaale kā yahī thā javāb

kyoñ na phir ġhash pe ġhash mujhe aa.e

un ko āġhosh meñ liye hai shabāb

zulfeñ bikhrī haiñ rū-e-anvar par

jān-e-‘āshiq pe hai do-gūna 'azāb

bhejā masjid se mai-kade kī taraf

shaiḳh ko bhī dikhā dī rāh-e-savāb

hasrateñ saarī mar ga.iiñ dil kī

kaisā ābād ghar huā hai ḳharāb

mausam-e-gul ho sāġhar-e-mul ho

but-e-rā'nā ho aur 'ahd-e-shabāb

na rahe phir namāz kī hājat

shaiḳh gar pī leñ ek jām-e-sharāb

āsmāñ par jo māh-e-kāmil hai

ham ne dekhā zamīñ pe us kā javāb

kis ne ruḳh se naqāb ulTī hai

māh-e-kāmil ko aa rahā hai hijāb

bachpana guzra aaya 'ahd-e-shabab

uD gai nind dekhne laga KHwab

chandni phaili hai mere ghar mein

jagta hun ki dekhta hun KHwab

talab-e-did par giri bijli

chahne wale ka yahi tha jawab

kyon na phir ghash pe ghash mujhe aae

un ko aaghosh mein liye hai shabab

zulfen bikhri hain ru-e-anwar par

jaan-e-‘ashiq pe hai do-guna 'azab

bheja masjid se mai-kade ki taraf

shaiKH ko bhi dikha di rah-e-sawab

hasraten sari mar gain dil ki

kaisa aabaad ghar hua hai KHarab

mausam-e-gul ho saghar-e-mul ho

but-e-ra'na ho aur 'ahd-e-shabab

na rahe phir namaz ki hajat

shaiKH gar pi len ek jam-e-sharab

aasman par jo mah-e-kaamil hai

hum ne dekha zamin pe us ka jawab

kis ne ruKH se naqab ulTi hai

mah-e-kaamil ko aa raha hai hijab