baDa KHushnuma ye maqam hai nai zindagi ki talash kar

baḌā ḳhushnumā ye maqām hai na.ī zindagī kī talāsh kar

tū na apne zehn kī baat kar na.ī dostī kī talāsh kar

tire āsmān kā sar kabhī kisī aur zamīn pe jhuk gayā

ye huā to aisā huā hī kyuuñ kabhī us kamī kī talāsh kar

kabhī ḳhvāhishoñ ke hujūm meñ jo phisal ga.e haiñ mire qadam

jise pī ke dahr sambhal gayā usī mai-kashī kī talāsh kar

jo bahār ko bhī aziiz thī vahī shaam lutf-o-surūr kī

jise siskiyoñ kī nazar lagī usī zindagī kī talāsh kar

jahāñ aadmī kī baqā rahe jahāñ fikr-o-fan ko jilā mile

jahāñ dard-e-nau kā pata mile vahāñ āgahī kī talāsh kar

na udaas shaam ke falsafe na bahār-e-sub.h kī raunaqeñ

na asl ziist ke zer-o-bam na to naġhmagī kī talāsh kar

jo bhī guftugū kā usuul hai usī baat kā tū ḳhayāl rakh

na.ī kā.enāt kī justujū na.ī raushnī kī talāsh kar

baDa KHushnuma ye maqam hai nai zindagi ki talash kar

tu na apne zehn ki baat kar nai dosti ki talash kar

tere aasman ka sar kabhi kisi aur zamin pe jhuk gaya

ye hua to aisa hua hi kyun kabhi us kami ki talash kar

kabhi KHwahishon ke hujum mein jo phisal gae hain mere qadam

jise pi ke dahr sambhal gaya usi mai-kashi ki talash kar

jo bahaar ko bhi aziz thi wahi sham lutf-o-surur ki

jise siskiyon ki nazar lagi usi zindagi ki talash kar

jahan aadmi ki baqa rahe jahan fikr-o-fan ko jila mile

jahan dard-e-nau ka pata mile wahan aagahi ki talash kar

na udas sham ke falsafe na bahaar-e-subh ki raunaqen

na asl zist ke zer-o-bam na to naghmagi ki talash kar

jo bhi guftugu ka usul hai usi baat ka tu KHayal rakh

nai kaenat ki justuju nai raushni ki talash kar