baDa kumba hai chhoTi degchi hai

baḌā kumba hai chhoTī degchī hai

aur us par bhuuk muñh khole khaḌī hai

jidhar tū ho udhar hī dekhtī hai

hamārī aañkh bhī sūraj-mukhī hai

mire maulā abhī sūraj na nikle

koī tahrīr shabnam likh rahī hai

koī nusḳha na hogā kārgar ab

mohabbat kaam apnā kar chukī hai

'ināyat par kisī kī jī rahe haiñ

hamārī zindagī kyā zindagī hai

mirī dil-jūī kī ḳhātir kisī ne

dahaktī aag dāman meñ rakhī hai

zamīñ meñ bhī utar jā.egā sūraj

abhī to barf kī chādar haTī hai

faqat ḳhushbū nahīñ titlī kī chāhat

vo phūloñ kā lahū bhī chāTtī hai

nazar aatā nahīñ kuchh bhī kisī ko

bazāhir raushnī hī raushnī hai

baDa kumba hai chhoTi degchi hai

aur us par bhuk munh khole khaDi hai

jidhar tu ho udhar hi dekhti hai

hamari aankh bhi suraj-mukhi hai

mere maula abhi suraj na nikle

koi tahrir shabnam likh rahi hai

koi nusKHa na hoga kargar ab

mohabbat kaam apna kar chuki hai

'inayat par kisi ki ji rahe hain

hamari zindagi kya zindagi hai

meri dil-jui ki KHatir kisi ne

dahakti aag daman mein rakhi hai

zamin mein bhi utar jaega suraj

abhi to barf ki chadar haTi hai

faqat KHushbu nahin titli ki chahat

wo phulon ka lahu bhi chaTti hai

nazar aata nahin kuchh bhi kisi ko

bazahir raushni hi raushni hai