badal chuke hain sab agli riwayaton ke nisab

badal chuke haiñ sab aglī rivāyatoñ ke nisāb

jo the savāb-o-gunah ho ga.e gunāh-o-savāb

numū ke baab meñ vo bebasī kā aalam hai

bahār maañg rahī hai ḳhizāñ rutoñ se gulāb

badal ke jaam bhī ham to rahe ḳhasāre meñ

hamāre paas lahū thā tumhāre paas sharāb

mire kahe ko amānat samajhnā mauj-e-havā

maiñ aane vaale zamānoñ se kar rahā huuñ ḳhitāb

so merī pyaas kā donoñ taraf ilaaj nahīñ

udhar hai ek samundar idhar hai ek sarāb

ḳhud āgahī kā salīqa sikhā gayā 'anjum'

mire ḳhilāf mire dostoñ kā istisvāb

badal chuke hain sab agli riwayaton ke nisab

jo the sawab-o-gunah ho gae gunah-o-sawab

numu ke bab mein wo bebasi ka aalam hai

bahaar mang rahi hai KHizan ruton se gulab

badal ke jam bhi hum to rahe KHasare mein

hamare pas lahu tha tumhaare pas sharab

mere kahe ko amanat samajhna mauj-e-hawa

main aane wale zamanon se kar raha hun KHitab

so meri pyas ka donon taraf ilaj nahin

udhar hai ek samundar idhar hai ek sarab

KHud aagahi ka saliqa sikha gaya 'anjum'

mere KHilaf mere doston ka istiswab