badal gai hain agarche zaruraten apni

badal ga.ī haiñ agarche zarūrateñ apnī

hamāre saath haiñ ab tak rivāyateñ apnī

hameñ hayāt kā har lamha tab bhī dozaḳh thā

hamāre paañv tale jab thiiñ jannateñ apnī

vo phuul ab khile jin kī talāsh meñ ham log

gañvā chuke haiñ kabhī ke basārateñ apnī

rahe haiñ apnī hī pahchān meñ yuuñ sargardāñ

ki yaad aatī nahīñ ham ko sūrateñ apnī

bike haiñ kauḌiyoñ ke bhaav to gila kis se

hamīñ ko ḳhud na thiiñ mā'lūm qīmateñ apnī

ḳhamoshiyoñ kī sadā.eñ bulā rahī thiiñ hameñ

na saath de sakīñ lekin samā'ateñ apnī

sabhī ko dā'vā hai 'āzād' jānte haiñ hamīñ

khulīñ na ham pe hī lekin haqīqateñ apnī

badal gai hain agarche zaruraten apni

hamare sath hain ab tak riwayaten apni

hamein hayat ka har lamha tab bhi dozaKH tha

hamare panw tale jab thin jannaten apni

wo phul ab khile jin ki talash mein hum log

ganwa chuke hain kabhi ke basaraten apni

rahe hain apni hi pahchan mein yun sargardan

ki yaad aati nahin hum ko suraten apni

bike hain kauDiyon ke bhaw to gila kis se

hamin ko KHud na thin ma'lum qimaten apni

KHamoshiyon ki sadaen bula rahi thin hamein

na sath de sakin lekin sama'aten apni

sabhi ko da'wa hai 'azad' jaante hain hamin

khulin na hum pe hi lekin haqiqaten apni