badal ke bhes wo chehra kahan kahan na mila

badal ke bhes vo chehrā kahāñ kahāñ na milā

talāsh jis kī thī vo husn-e-jāvedāñ na milā

khaḌā huuñ kab se sar-e-rahguzār-e-vaqt nadīm

maiñ jis ke saath chalūñ aisā kārvāñ na milā

ḳhizāñ guzar ga.ī lekin guloñ ke rañg haiñ zard

bahār ko sila-e-ḳhūn-e-kushtagāñ na milā

kahāñ se zehn meñ chhup chhup ke vahm aate haiñ

kabhī yaqīñ ko surāġh-e-rah-e-gumāñ na milā

maiñ ahl-e-fikr kī bastī bhī rauñd aayā huuñ

kahīñ koī ġham-e-hastī kā rāzdāñ na milā

kuchal ke yaad kī lāsheñ guzar gayā ġham-e-dahr

maiñ DhūñDhtā rahā zaḳhmoñ kā bhī nishāñ na milā

utar ke dekh chukā rañg ke jazīroñ meñ

tire shabāb kā vo rañg-e-arġhavāñ na milā

badal ke bhes wo chehra kahan kahan na mila

talash jis ki thi wo husn-e-jawedan na mila

khaDa hun kab se sar-e-rahguzar-e-waqt nadim

main jis ke sath chalun aisa karwan na mila

KHizan guzar gai lekin gulon ke rang hain zard

bahaar ko sila-e-KHun-e-kushtagan na mila

kahan se zehn mein chhup chhup ke wahm aate hain

kabhi yaqin ko suragh-e-rah-e-guman na mila

main ahl-e-fikr ki basti bhi raund aaya hun

kahin koi gham-e-hasti ka raazdan na mila

kuchal ke yaad ki lashen guzar gaya gham-e-dahr

main DhunDhta raha zaKHmon ka bhi nishan na mila

utar ke dekh chuka rang ke jaziron mein

tere shabab ka wo rang-e-arghawan na mila