badal saka na judai ke gham uTha kar bhi

badal sakā na judā.ī ke ġham uThā kar bhī

ki maiñ to maiñ hī rahā tujh se duur jā kar bhī

maiñ saḳht-jān thā is karb se bhī bach niklā

maiñ jī rahā huuñ tujhe haath se gañvā kar bhī

ḳhudā kare tujhe duurī hī raas aa jaa.e

tū kyā karegā bhalā ab yahāñ par aa kar bhī

abhī to mere bikharne kā khel baaqī hai

maiñ ḳhush nahīñ huuñ abhī apnā ghar luTā kar bhī

maiñ us ko sat.h se mahsūs kar ke bhī ḳhush huuñ

vo mutma.in hī nahīñ merī tah ko pā kar bhī

abhī tak us ne koī bhī to faisla na kiyā

vo chup hai mujh ko har ik tarah aazmā kar bhī

usī hujūm meñ laḌ-bhiḌ ke zindagī kar lo

rahā na jā.egā duniyā se duur jā kar bhī

vo log aur hī the jin kā ijz phal laayā

hameñ to kuchh na milā apne ko miTā kar bhī

khulā ye bhed ki tanhā.iyāñ hī qismat haiñ

ik umr dekh liyā mahfileñ sajā kar bhī

ġhazal kahe pe bhī sochoñ kā bojh kam na huā

sakūñ na mil sakā ahvāl-e-dil sunā kar bhī

rukā na zulm mire raakh banñe par bhī 'riyāz'

huā kī ḳhū to vahī hai mujhe jalā kar bhī

badal saka na judai ke gham uTha kar bhi

ki main to main hi raha tujh se dur ja kar bhi

main saKHt-jaan tha is karb se bhi bach nikla

main ji raha hun tujhe hath se ganwa kar bhi

KHuda kare tujhe duri hi ras aa jae

tu kya karega bhala ab yahan par aa kar bhi

abhi to mere bikharne ka khel baqi hai

main KHush nahin hun abhi apna ghar luTa kar bhi

main us ko sath se mahsus kar ke bhi KHush hun

wo mutmain hi nahin meri tah ko pa kar bhi

abhi tak us ne koi bhi to faisla na kiya

wo chup hai mujh ko har ek tarah aazma kar bhi

usi hujum mein laD-bhiD ke zindagi kar lo

raha na jaega duniya se dur ja kar bhi

wo log aur hi the jin ka ijz phal laya

hamein to kuchh na mila apne ko miTa kar bhi

khula ye bhed ki tanhaiyan hi qismat hain

ek umr dekh liya mahfilen saja kar bhi

ghazal kahe pe bhi sochon ka bojh kam na hua

sakun na mil saka ahwal-e-dil suna kar bhi

ruka na zulm mere rakh banne par bhi 'riyaz'

hua ki KHu to wahi hai mujhe jala kar bhi