badan se ruh ke rishte ka dhyan hote hue

badan se ruuh ke rishte kā dhyān hote hue

maiñ dar-ba-dar hī phirā huuñ makān hote hue

ye kaun aayā ki chehre pe aa ga.ī raunaq

janam janam kī musalsal thakān hote hue

jhulas rahe haiñ badan kaise tez garmī se

hamāre sar pe ka.ī sā.ebān hote hue

pahuñch hī jā.ūñgā fardā kī ḳhvāb-gāhoñ meñ

tumhārī yaad kā dhuñdlā nishān hote hue

ināyateñ huiiñ mausam kī bārhā mujh par

use bhī dekhūñ kabhī mehrbān hote hue

zamīn-e-fikr se rishta mirā kahāñ TuuTā

ḳhayāl-o-ḳhvāb kī ūñchī uḌaan hote hue

nigāheñ dekhne lagtī haiñ rāstoñ kī taraf

safar meñ kitnā hī manzil kā dhyān hote hue

qadam-qadam pe haiñ lashkar muhāfizoñ ke 'nisār'

hamāre shahr meñ amn-o-amān hote hue

badan se ruh ke rishte ka dhyan hote hue

main dar-ba-dar hi phira hun makan hote hue

ye kaun aaya ki chehre pe aa gai raunaq

janam janam ki musalsal thakan hote hue

jhulas rahe hain badan kaise tez garmi se

hamare sar pe kai saeban hote hue

pahunch hi jaunga farda ki KHwab-gahon mein

tumhaari yaad ka dhundla nishan hote hue

inayaten huin mausam ki barha mujh par

use bhi dekhun kabhi mehrban hote hue

zamin-e-fikr se rishta mera kahan TuTa

KHayal-o-KHwab ki unchi uDan hote hue

nigahen dekhne lagti hain raston ki taraf

safar mein kitna hi manzil ka dhyan hote hue

qadam-qadam pe hain lashkar muhafizon ke 'nisar'

hamare shahr mein amn-o-aman hote hue