badan tha soya hua ruh jagti hui thi

badan thā soyā huā ruuh jāgtī huī thī

ye kaisī raat mire darmiyāñ rukī huī thī

maiñ sajda-rez huuñ dahlīz-e-āsmāñ pe abhī

ki mujh ko ḳhil'at-e-ḳhāKī yahīñ milī huī thī

chaTaḳh ke Tuut ga.ī hai to ban ga.ī āvāz

jo mere siine meñ ik roz ḳhāmushī huī thī

baḌhā ke rakkhā gayā hai hisāb-e-roz-e-jazā

na jaane is ke liye kaun sī kamī huī thī

chamak ga.e mirī āñkhoñ meñ anfus-o-āfāq

ki tere dhyān se dam-bhar ko raushnī huī thī

jalā gayā hai lahū meñ koī charāġh-e-suḳhan

bahut dinoñ se tabī'at mirī bujhī huī thī

badan tha soya hua ruh jagti hui thi

ye kaisi raat mere darmiyan ruki hui thi

main sajda-rez hun dahliz-e-asman pe abhi

ki mujh ko KHil'at-e-KHaKi yahin mili hui thi

chaTaKH ke Tut gai hai to ban gai aawaz

jo mere sine mein ek roz KHamushi hui thi

baDha ke rakkha gaya hai hisab-e-roz-e-jaza

na jaane is ke liye kaun si kami hui thi

chamak gae meri aankhon mein anfus-o-afaq

ki tere dhyan se dam-bhar ko raushni hui thi

jala gaya hai lahu mein koi charagh-e-suKHan

bahut dinon se tabi'at meri bujhi hui thi