baDe hi mood mein titli thi us din

baḌe hī mood meñ titlī thī us din

tumhārī baat phir niklī thī us din

faqat ḳhud ko na tum ilzām denā

havā bhī kuchh zarā paglī thī us din

tere hāthoñ meñ merī uñgliyāñ thiiñ

balā kī tishnagī machlī thī us din

vo din jab ham jiye the asliyat meñ

lagī duniyā hameñ niklī thī us din

chhatoñ par shor thā bas bārishoñ kā

mehrbāñ chāñd par badlī thī us din

tere kāñdhe pe ik bhūrā nishāñ thā

vahīñ par sham.a ik pighlī thī us din

thā shaidā āsmāñ chehre pe tere

nazar tāroñ kī bhī phislī thī us din

bahak jaane meñ āsānī thī kitnī

baḌī mushkil se jaañ sambhalī thī us din

ye maanā muḳhtasar sā ek din thā

mohabbat jān-e-man aslī thī us din

baDe hi mood mein titli thi us din

tumhaari baat phir nikli thi us din

faqat KHud ko na tum ilzam dena

hawa bhi kuchh zara pagli thi us din

tere hathon mein meri ungliyan thin

bala ki tishnagi machli thi us din

wo din jab hum jiye the asliyat mein

lagi duniya hamein nikli thi us din

chhaton par shor tha bas barishon ka

mehrban chand par badli thi us din

tere kandhe pe ek bhura nishan tha

wahin par shama ek pighli thi us din

tha shaida aasman chehre pe tere

nazar taron ki bhi phisli thi us din

bahak jaane mein aasani thi kitni

baDi mushkil se jaan sambhali thi us din

ye mana muKHtasar sa ek din tha

mohabbat jaan-e-man asli thi us din