baDi jaani hui aawaz mein kis ne bulaya hai

baḌī jaanī huī āvāz meñ kis ne bulāyā hai

koī guzre hue vaqtoñ se shāyad lauT aayā hai

chalo ab soch kar ye hī sharāfat se bichhaḌ jaa.eñ

ye dil-vil to javānī meñ sabhī ne hī lagāyā hai

hameñ to lag rahā thā ye ki ham gumnām haiñ lekin

kisī ne aaj phir darvāza dil kā khaTkhaTāyā hai

hamārā naam hī aayā nahīñ puure fasāne meñ

kahānī ko kuchh is andāz se us ne sunāyā hai

hamāre dil kā vo āñgan jahāñ taare na the kal tak

usī meñ chaudhvīñ kā chāñd puurā jagmagāyā hai

na koī ḳhat milā ham ko nahīñ paiġhām koī par

sunā dāvat kā us ne shahr meñ ruqqa ghumāyā hai

baDi jaani hui aawaz mein kis ne bulaya hai

koi guzre hue waqton se shayad lauT aaya hai

chalo ab soch kar ye hi sharafat se bichhaD jaen

ye dil-wil to jawani mein sabhi ne hi lagaya hai

hamein to lag raha tha ye ki hum gumnam hain lekin

kisi ne aaj phir darwaza dil ka khaTkhaTaya hai

hamara nam hi aaya nahin pure fasane mein

kahani ko kuchh is andaz se us ne sunaya hai

hamare dil ka wo aangan jahan tare na the kal tak

usi mein chaudhwin ka chand pura jagmagaya hai

na koi KHat mila hum ko nahin paigham koi par

suna dawat ka us ne shahr mein ruqqa ghumaya hai