badnam hun par aashiq-e-badnam tumhaara

badnām huuñ par āshiq-e-badnām tumhārā

nākām huuñ par tālib-e-nākām tumhārā

maiñ is ko na bechūñ evaz-e-mulk-e-sulaimāñ

hai sabt sar-e-ḳhātim-e-dil naam tumhārā

yaañ sāġhar-e-dil ḳhūn-e-tamannā se bharā hai

par bāda-e-gulgūñ se vahāñ jaam tumhārā

mahrūmī-e-qismat hai mirī ḳhaas vagarna

mash.hūr-e-jahāñ hai karam-e-ām tumhārā

jachte nahīñ nazroñ meñ mah-o-mehr ke jalve

rahtā hai tasavvur sahar-o-shām tumhārā

tum jis se phiro us se ho bargashta zamāna

dam bharne lagī gardish-e-ayyām tumhārā

ġhaflat meñ kaTī jaatī hai 'mahrūm' javānī

achchhā nazar aatā nahīñ anjām tumhārā

badnam hun par aashiq-e-badnam tumhaara

nakaam hun par talib-e-nakaam tumhaara

main is ko na bechun ewaz-e-mulk-e-sulaiman

hai sabt sar-e-KHatim-e-dil nam tumhaara

yan saghar-e-dil KHun-e-tamanna se bhara hai

par baada-e-gulgun se wahan jam tumhaara

mahrumi-e-qismat hai meri KHas wagarna

mashhur-e-jahan hai karam-e-am tumhaara

jachte nahin nazron mein mah-o-mehr ke jalwe

rahta hai tasawwur sahar-o-sham tumhaara

tum jis se phiro us se ho bargashta zamana

dam bharne lagi gardish-e-ayyam tumhaara

ghaflat mein kaTi jati hai 'mahrum' jawani

achchha nazar aata nahin anjam tumhaara