badnami-e-ulfat ko ye aar na samjhega

badnāmī-e-ulfat ko ye aar na samjhegā

is dil ko na samjhāo zinhār na samjhegā

bīmār huā huuñ maiñ ik ishva-e-pinhāñ se

iisā bhī mire dil ko āzār na samjhegā

hirs us lab-e-shīrīñ kī kyā dil se mire kam ho

parhez kabhū achchhā bīmār na samjhegā

ġhaflat ko javānī kī kuchh pūchho na ai zāhid

be-hoshī kī lazzat ko hushiyār na samjhegā

go rāh-e-mohabbat meñ jaatī haiñ chalī jāneñ

mard-e-rah-e-ishq is ko dushvār na samjhegā

mujh se hai use milnā ik nang kā baa.is hai

aġhyār ke milne ko vo aar na samjhegā

samjhāne do nāseh ko mat manā karo yaaro

jab tak na sunegā vo do-chār na samjhegā

hāl-e-dil-e-ḳhūñ-gashta 'nāmī' ne lahū ro ro

naame meñ kiyā inshā par yaar na samjhegā

badnami-e-ulfat ko ye aar na samjhega

is dil ko na samjhao zinhaar na samjhega

bimar hua hun main ek ishwa-e-pinhan se

isa bhi mere dil ko aazar na samjhega

hirs us lab-e-shirin ki kya dil se mere kam ho

parhez kabhu achchha bimar na samjhega

ghaflat ko jawani ki kuchh puchho na ai zahid

be-hoshi ki lazzat ko hushiyar na samjhega

go rah-e-mohabbat mein jati hain chali jaanen

mard-e-rah-e-ishq is ko dushwar na samjhega

mujh se hai use milna ek nang ka bais hai

aghyar ke milne ko wo aar na samjhega

samjhane do naseh ko mat mana karo yaro

jab tak na sunega wo do-chaar na samjhega

haal-e-dil-e-KHun-gashta 'nami' ne lahu ro ro

name mein kiya insha par yar na samjhega