bagule rahnuma hain baad-e-sahrai safar mein hai

bagūle rahnumā haiñ bād-e-sahrā.ī safar meñ hai

rukeñ kaise hamāre saath rusvā.ī safar meñ hai

ḳhabar bhī to nahīñ hai ab kidhar ko jā rahe haiñ ham

sarāboñ kā safar hai ābla-pā.ī safar meñ hai

ye bastī hai ki zindāñ kuchh bhī to palle nahīñ paḌtā

the kab pachhuā ke din aur kab se purvā.ī safar meñ hai

kahāñ se aa.iiñ kānoñ ke liye rim-jhim sī āvāzeñ

jaras ik lafz-e-pārīna hai shahnā.ī safar meñ hai

azal se tā-abad hai kār-farmā gardish-e-daurāñ

ki nādānī hazar meñ aur dānā.ī safar meñ hai

use sadiyāñ lageñgī niiñd se bedār hone meñ

abhī āġhāz kā mausam hai añgḌā.ī safar meñ hai

koī aahaT banātī hī nahīñ ummīd kā mausam

kuchh aisī chup lagī hai jaise goyā.ī safar meñ hai

akele-pan kā 'azmī' ho bhī to ehsās kaise ho

tasalsul se hamārī shām-e-tanhā.ī safar meñ hai

bagule rahnuma hain baad-e-sahrai safar mein hai

ruken kaise hamare sath ruswai safar mein hai

KHabar bhi to nahin hai ab kidhar ko ja rahe hain hum

sarabon ka safar hai aabla-pai safar mein hai

ye basti hai ki zindan kuchh bhi to palle nahin paDta

the kab pachhua ke din aur kab se purwai safar mein hai

kahan se aain kanon ke liye rim-jhim si aawazen

jaras ek lafz-e-parina hai shahnai safar mein hai

azal se ta-abad hai kar-farma gardish-e-dauran

ki nadani hazar mein aur danai safar mein hai

use sadiyan lagengi nind se bedar hone mein

abhi aaghaz ka mausam hai angDai safar mein hai

koi aahaT banati hi nahin ummid ka mausam

kuchh aisi chup lagi hai jaise goyai safar mein hai

akele-pan ka 'azmi' ho bhi to ehsas kaise ho

tasalsul se hamari sham-e-tanhai safar mein hai