bahaaren rang lati hain chaman aabaad hota hai

bahāreñ rang laatī haiñ chaman ābād hotā hai

ki jab nāzuk laboñ se husn kā irshād hotā hai

hasīnoñ kī adāoñ ke asar-andāz hote hī

kabhī dil shaad hotā hai kabhī nāshād hotā hai

ijāzat jab nahīñ miltī use naġhma-sarā.ī kī

to bulbul kī ḳhamoshī se chaman barbād hotā hai

vo apnī jaan kī baazī lagā.e to lagā.e kyoñ

ki naḳhra husn kā jis ke liye jallād hotā hai

nigāhoñ se paḌhī jaatī hai tahrīr-e-ruḳh-e-raushan

nigāhoñ se adā-bīnī kā fan ījād hotā hai

adā-e-husn bhī ik chashma-e-tahrīk hai sāhab

use apnā le jo bhī bas vahī shah-zād hotā hai

usī ko karnā hotī hai alam kī tarjumānī bhī

mire hoñToñ pe jo bhī jumla-e-fariyād hotā hai

kisī ko bhī yaqīñ hotā nahīñ hai apnī āñkhoñ par

qafas meñ jab parinde kī jagah sayyād hotā hai

usī par naaz kartī hai hamesha haath kī rekhā

ki jis kī muTThī meñ bhī virsa-e-ajdād hotā hai

hamesha sar jhukātā hai 'jigar' sāhab kī dhartī par

ki jaanā jab bhī panchhī kā murādābād hotā hai

bahaaren rang lati hain chaman aabaad hota hai

ki jab nazuk labon se husn ka irshad hota hai

hasinon ki adaon ke asar-andaz hote hi

kabhi dil shad hota hai kabhi nashad hota hai

ijazat jab nahin milti use naghma-sarai ki

to bulbul ki KHamoshi se chaman barbaad hota hai

wo apni jaan ki bazi lagae to lagae kyon

ki naKHra husn ka jis ke liye jallad hota hai

nigahon se paDhi jati hai tahrir-e-ruKH-e-raushan

nigahon se ada-bini ka fan ijad hota hai

ada-e-husn bhi ek chashma-e-tahrik hai sahab

use apna le jo bhi bas wahi shah-zad hota hai

usi ko karna hoti hai alam ki tarjumani bhi

mere honTon pe jo bhi jumla-e-fariyaad hota hai

kisi ko bhi yaqin hota nahin hai apni aankhon par

qafas mein jab parinde ki jagah sayyaad hota hai

usi par naz karti hai hamesha hath ki rekha

ki jis ki muTThi mein bhi wirsa-e-ajdad hota hai

hamesha sar jhukata hai 'jigar' sahab ki dharti par

ki jaana jab bhi panchhi ka muradabaad hota hai